٩ نصائح لصور جميلة لأطفالكم

مثل ما وعدتكم راح انزل موضوع تصوير اليهال بالعربي الي نزلته بالانجليزي قبل جم يوم. هالنصايح راح تفيدكم حتى لو ما كان عندكم كاميرا احترافية و بس تستخدمون التلفون  للتصوير.

9 Tips to take better photos of your kids

Since receiving my online professional photography certificate 6 years ago I have been attempting  all kinds of photography but I was especially drawn to food photography and kids /newborn  photography. I have attended several Creativelive live classes on babies photography and I have photographed my own son ( born in 2013) and several other kids in the family. I have learned many tips and tricks that I am going to share them with you,  but I have also learned that getting perfect picture of a child is less about the camera and more about specific techniques. So weather you own a professional camera , a point and shoot or just take pictures with your smartphone these tips will apply to you. 

دياي بالمقلى مع صلصلة المشروم

جربت هالوصفة قبل جم اسبوع من موقع اجنبي و وايد طلعت لذيذه و طريقتها وايد سهلة. بس طبعا يبيلكم مقلاة الكاست آيرون  (cast iron skillet) الي تدش الفرن.  انا مالتي خذيتها من ايكيا ب ٩ دنانير وايد ارخص من باجي الماركات و لحد الآن زينة وياي.

المقادير:

دياية كاملة مقطعة ١٠ قطع

٣ قفاش زبدة ( ٣ قطع صغيرة)

ملح و فلفل

٣ فصوص ثوم مهروس

علبة مشروم

كوب ماي دياي ( او كوب ماي + ملعقة خلاصة الخضار ارض الطبيعة)

١/٢ م شاي ريحان ناشف

١/٢ م شاي اوريجانو

١/٢ م شاي زعتر (thyme)

١/٤ كوب كريمة سائلة

١/٤ كوب جبن بارمزان

١ م كبيرة خردل

٣ نصائح تربوية

اول شي بقوله إني مو خبيرة تربية و لا اخصائية  و لا اي شي من هذيل.  و لا اني أم مثالية و ما أغلط. بس هذيل جم نقطة و فكرة تعلمتها من تجربتي كأم و من محاضرات و ندوات و كتب عن التربية قريتها و فادتني مع عيالي. ثاني شي بقوله اني اكتشفت ( واكيد انتو اكتشفتوا هالشي بعد) انه التربية اصعب شي تسوينه بالدنيا. اصعب من الحمل و الولادة و الجامعة و الدوام. ( بس ما ادري اذا اصعب من البريسنتيشن و لا لأ D:) فاي نصيحة و او معلومة او طريقة تفيدني بهالمجال باخذها. فاذا عندكم افكار حلوه تضيفونها لا تبخلون علي فيها.

* ٣ نصائح تربوية عامة:

١- كوني الشخصية الي تبينهم يصيرونها

كلنا عندنا تصور معين عن عيالنا. نبيهم يكبرون و يحصلون  و يصيرون و يكونون. بس صدقوني كثر ما تقولين و تفهمين و تعلمين مو نفس لمن اهمه يشوفونج الشخص المثالي الي تبينهم يكونونه. انا دايما اذكر روحي بهالشي كل ما تنبط جبدي من عيالي من عادة مو زينه فيهم او شي ما يسوونه عدل. اسأل روحي هل انا قاعد اسوي نفس الغلطة الي قاعد ازفهم عليها. اذا اي عيل لازم اعدل بروحي اول و مالي حق اهاوشهم على شي انا قاعد اسويه.

فضفضة

كنت يايه اكتب اليوم موضوع عن التربية و جم نصيحة استفدتها من تجربتي مع عيالي و من جم كتاب قاريته بس في شي 

بقلبي لازم اكتب عنه اول بعدين احطلكم موضوع التربية.

بخصوص الفيديو الي انتشر امس او اول امس عن الأبلةالي شاريه برد و قاعد توكل كل اليهال من نفس البرد و ترد اهيه تاكل منه. يمكن اغلبكم شفتوه و الي ما شافه اكيد بيوصله بهاليومين بالواتساب. 

المهم انا سمعت انه الأبلة فنشوها من المدرسة. الحين...هذي الأبلة بالفعل سوت شي غلط و سوء تصرف كان منها الي سوته بس هذي الي قاعد تصور بأي حق تصورين و تنشرين و تشهرين بالأبلة. صح الي سوته شي غلط بس انتي مو حقج تصورين و تشهرين خصوصا انه هذيلي مو عيالها. شدراج هذي الأبلة زينه و لا مو زينه. صح سوت شي يلوع الجبد بس ما عرضت حياة اي احد من الأطفال للخطر. اذا صحيح الكلام انه هذي الأبلة المسكينة فصلوها و قطعو رزقتها فكله برقبة هذي الي صورت. منو عينج شرطي على الناس. و منو ما يغلط او يسيء التصرف بوقت من الأوقات. انا كل يوم اشوف ناس يخترقون القانون..يطوفون اشارة حمرا...يسفطون بمسافط معوقين  يقطون وصخ بالشارع يدوسون بحارة الأمان ما اروح امسك كامرتي و اصورهم و اشهرهم لانه مو شغلتي اكون شرطي على الناس. و هذيل الي قاعد يسوونه وااايد اخطر من الي سوته الأبلة . خصوصا الي يطوفون اشارة حمرا او يسرعون قاعد يعرضون حياتهم و حياة عيالهم الي بالسيارة وياهم و حياة الناس الي بالسيارات الثانية للخطر. يلا بعد مسكي كامرتج و صوريهم و شهريهم. لااا مو جذي السالفة يا جماعة.

اهيه كان يحق لها تصور في حالة وحدة بس اذا واحد من اليهال ولدها او بنتها او يصيرلها و حتى في هذي الحالة التصرف الصح انها تودي الفيديو المدرسة و توريهم اياه و تخليهم يتخذون اللازم. و اذا ما سوو شي ذيج الساعة يمكن يحقلها تشهر فيهم.

و انا ما بط جبدي الا لسانها الوصخ. عدو جم مره سبت بالفيديو. يمكن اربع او خمس مرات ب٣٠ ثانيه. انا شخصيا اشوف السب و الصراخ و التهزيئ الي يسوونه الأمهات و بعض الأبلات بحق اليهال واايد اخطر على الياهل من ( كله برد من حلج ابله). هذا يلوع الجبد صح بس شنو ممكن يصير بالياهل. يتعادى اذا واحد فيهم كان فيه نشلة؟بس السب و الصراخ و التهزيء شنو نتايجه؟ شخصية مهزوزة و نفسية مجروحة طوول العمر. 

يا نااس بسكم سطحية بسكم. يلبسون عيالهم اغلى الملابس و اهمه زافينهم زف عشان يطلعونهم من البيت. تسب بنتها من الصبح لليل و بعدين حفلة بالمدرسة تترسها ورد من فوق لتحت. يشترولهم اغلى الاجهزة و الألعاب و ما يعطونهم من وقتهم لو نص ساعة. الولد الي يحس انه غالي عند امه و ابوه ما يحتاج ملابس غاليه عشان يكون كشخة. و البنيه الي تحس انها وردة امها ما تبي ورد ينحط على رقبتها. و الياهل الي امه و ابوه يعطونه من وقتهم و يسمعوله ما يحتاج العاب و اجهزة غاليه عشان يحس انه مهم.

و بسس...هذا الي بغيت اقوله و كان يقرقع بقلبي. باجر انشاء الله يكون موضوعنا عن التربية. و شكرا

صلصة الرانش المنزلية Homemade Ranch dressing

السلام عليكم...من زمان ما نزلت شي بالمدونة. كنا اول شي لاهين بالإمتحانات و نهاية المدرسة بعدين سافرنا بالعطلة و بعدها لازم نقاهة بعد السفر مع اليهال ( الموجي الي يبجي) . المهم اليوم يايبلتلكم وصفة صلصة الرانش تسوونها بالبيت ، سهلة و لذيذة و راح تخليكم تاكلون سلطة أكثر. 

إلي ما يعرف الرانش ranch اهيه صلصة أمريكية الأصل و المنشأ. واحد أمريكي اسمه ستيف هينسون ألفها بالخمسينات و بعدين بدا يقدمها بمطعمه و من كثر ما الناس كان عاجبهم قامو يشترون منه الصلصة بروحها و شوي شوي سوولهم مصنع و قامو يبيعونها بكل جمعيات أمريكا. لمن كنا عايشين بأمريكا كنا نشتري منها وايد بس اهني بالكويت ما في شي وايد عجبني فقررت أسويها بروحي و زين الحمد لله طلعت سهلة و ما يبيلها وايد مقادير.