٩ نصائح لصور جميلة لأطفالكم

مثل ما وعدتكم راح انزل موضوع تصوير اليهال بالعربي الي نزلته بالانجليزي قبل جم يوم. هالنصايح راح تفيدكم حتى لو ما كان عندكم كاميرا احترافية و بس تستخدمون التلفون  للتصوير.

قبل لا ابدا بقولكم قصة صغيرة. لمن خلصت ثالثة ابتدائي و كان عمري وكتها ٨ سنين تقريبا ابوي يابلي هدية تفوقي كاميرا. كانت كاميرا صغيرة بلاستيك من بره لونها ازرق و عندها كفر لونه ازرق بعد و فيها حبل يتعلق بالرقبة. حبيت الكاميرا هذي واايد. و كنت دايما شايلتها على رقبتي.و  ابوي كان يحب التصوير و دايما كان يروح يشترلي افلام (ايي انا من ايام الأفلام) و كان مسجين يتعنى و يوديهم و بعدين مره ثانية يروح و اييبلي الصور .  صورت بهالكاميرا ذكريات وايد من طفولتي بالبر و بزوارات الأهل و بطلعاتنا العائلية. طبعا بعدين كبرت و شوي شوي هديت الكاميرا و بعدين طلعو الكاميرات الديجيتال و نسيت عنها و الحين  للأسف ما ادري وينها  بس هالكاميرا كانت اول حب لي مع التصوير. 

بعد ما تخرجت من الجامعة ( كنا بامريكا ذاك الوكت) و كنت مقررة اصلا اني ما ابي اكمل دراستي و لا ابي اشتغل , قعدت ادور على شي حرفي و ابداعي اقدر اسويه بالبيت. قررت اسجل بدورة تصوير اون لاين و شريتلي اول كاميرا احترافية. هذا كان ب ٢٠١٠و من ذاك الوكت و انا اصور و اخذ دورات شخصية و اون لاين و اكثر شي حبيته بالتصوير اهو تصوير الأطعمة و اليهال. الصور الي اهني اغلبها صور ولدي و في بعضهم صور عيال اختي و عيال العايلة. انشاء الله تستفيدون من الموضوع و اذا في شي معين تبوني اتحجى عنه اكثر كتبو بالتعليقات.

١-  ضبطوا الإضاءة

اهم شي بأي صورة اهي الإضاءة. اذا الإضاءة مو شي ما في شي ثاني راح ينقذ الصورة. طبعا مو لازم معدات و اضاءات احترافية عشان تحصلون على نتايج حلوة. دورولكم دريشة بالبيت تدخل ضوء زين طول النهار, خلوها وراكم او على جنبكم ( يمينكم او يساركم) و انتو تصورون . يعني قعدو الياهل بينكم و بين الدريشة بحيث انه الضوء يصير وراكم او انه الياهل يكون جدامكم و الدريشة على جنبكم. ابتعدو عن الإضاءة الخلفية ( لمن الضوء يكون ورا الياهل). وكت التصوير خلوه يا اما الصبح وايد مبجر او العصاري لمن الشمس تبدى تطيح . لا تصورون بالاوقات الي الشمس تكون فيها بنص السما و الضوء وايد قوي ( تقريبا من عشر الصبح إلى الساعة ٣ او ٤) . وايد مهم بعد انكم ماا تبطلون الليتات الداخلية. الليتات الداخلية درجة لونها و اضائتها وايد غير عن ضوء الشمس و لمن تصورون مع درجات اضاءات مختلفة الصورة راح تطلع وايد مو حلوه و غلط و ووايد صعب ترقعون فيها بعدين ببرامج التعديل.

تقدرون تصورون بره البيت بعد . صور اليهال بالحديقة او عالبحر وايد حلوه. اتبعو نفس النصايح الي قتلكم عنها قبل شوي. لا تصورون بعز النهار نطرو لمن الشمس تطيح و يصير الظل طويل. تخيلو انه الشمس اهي الدريشة و خلوها اما وراكم او على جنبكم. الصور الي انا حاطتها اهني كله مصورتها ببيتي يم الدريشة او بره وقت العصاري.

٢- كل ما كانت الصورة بسيطة كانت أحلى

انا وحده أؤمن ببساطة الجمال و بجمال البساطة. ليش؟ أولا لما تكون الصورة بسيطة يعني ما يبيلكم خلفيات معقدة و اكسسوارات و عفسة. كل الي يبيله شرشف ابيض او بيج ، كنابل بيضة ، اكسسوارات بسيطة و تطلع الصورة عجيبة. ثانيا الملابس الي متروسه الوان و حركات راح تاخذ من جمال الياهل و برائته و بساطة ملامحه و راح تخلي الي يطالع الصورة يشوف اللبس قبل الياهل و احنا مو هذا الي نبيه.

٣- اخذو افكار من بينترست.

بينترست (pinterest) عجيب حق هالسوالف. راح تلقون فيه افكار و فناتق وايد حلوه. تقدرون تشوفون بوردز boards الي بس فيهم صور يهال او تقدرون تسوون بحث بعمر الياهل و جنسه و تشوفون شنو يطلعلكم . مثال : "12 month old baby girl" .  اذا تطقون عالصورة الي تحت راح يوديكم حق البورد الي باكاونتي الي انا حاطيه فيه كل افكار صور الياهل الي تعجبني.

٤- زاوية التصوير 

او تركيب الصورة. هني تقدرون تطلعون ابداعاتكم و تتفتكون. بس اذا ما تعرفون من وين تبدون لا تخافون. طالعو بينرست مره ثانيه. نقو صورة عاجبتكم و حاسين انكم تقدرون تصورونها. حاولو تقلدونها كثر ما تقدرون و بعدين جربو تغيرون فيها شوي و شوفو شنو يطلع معاكم. بالنسبه لي احب اخذ صورة من بعيد تبين الياهل مع المكان الي فيه و بعدين اقرب و اخذ صور التفاصيل الصغيرة. و طبعا انا معروفة بتصوير اليهال من ورا. ما ادري ليش بس احب هالزاوية حق  اليهال وايد.

٥- صورو  الاكسسوارات بروح

لمن تخلصون من تصوير الياهل و خلاص وكلتوه او نومتوه اخذو الملابس او الألعاب الي صورتوهم وياه و صوروهم بروح. او حتى المكان الي صورتو فيه هم صوروه بروح. لمن بعدين تحطون الصور كلها ويا بعض هالتفاصيل راح تعطي جو و تصير  الصور كلها كأنها قصة.

٦- خلو الياهل على راحته، لا تستعيلون بالتصوير

دايما يكون ببالنا فكرة معينة و نبي نصورها بسرعة. او ورانا شي و نبي نخلص من التصوير بسرعة. بس دايما الصور الاولى ما تكون حلوه. الياهل يمكن يكون عسر لانكم ملبسينه ملابس اهو مو متعود عليها او اذا بمكان يديد للحين ما يكون ماخذ عالمكان عدل. نصيحتي انكم تصورون جم صورة بالأول بس تتأكدون من الاضاءة و الزاوية و هالشغلات ، بعدين تخلون الكاميرا على جنب ( بس مو بعيدة) و تريحون و تستانسون انتو و عيالكم. دايما احلى صور و احلى لقطات اهي اللقطات العفوية الي مو مخططيلها.

٧- صورو كل التعابير 

دايما لمن نصور اليهال نبي يكون عندنا صور و اهمه مستانسين و يضحكون و يبتسمون . و دايما نحاول نخليهم يضحكون عشان نصورهم. بس الواقع انه الياهل مو طول الوكت مستانس و يضحك. الياهل مرات معصب ، زعلان ، نعسان ...الخ, انا اقول صورو كل تعابيرهم لانه هالتعابير حلوه مثلهم و راح تتذكرون هالايام الحلوه و هالتعابير لمن تطالعونهم عشر ..عشرين سنة بعدين.

٨- حمضو الصورة

طبعا مصطلح تحميض الصورة قديم جدا و الي ما لحق على ايام الفلم ما راح يعرف انا شنو اقصد. بس تحميض او (تعديل) الصورة بعصر الديجيتال وايد مهم مثل ما كان بعصر الأفلام. الي له خلفية بالتصوير و يصور بكاميرا احترافية بصيغة ال raw يعرف انه لازم يعدل الصورة عشان يقدر يستخدمها بأي شي. بس حتى لو ما كنتو محترفين او عندكم خلفية شويه تعديلات عالصورة راح تفرق وياكم. البرامج الي انصح فيها حق الكمبيوتر اهيه لايت روم Lightroom او Picasa للمبتدئين. حاولو تلعبون بالإضاءة شوي و بال presets. حق صور اليهال وايد حلو الأبيض و الأسود و ال vingetting (التظليل من الأطراف) و ال vintage wash . البرامج الي انصح فيها حق التلفون اهي snapseed و VSCO . اثنيناتهم تقدرون تتحكمون بالإضاءة و الألوان فيهم و هم عندهم الفلاتر الجاهزة الي تقدرون تحطونهم علطول عالصورة.

٩- طبعوها

الحين انتو صورتو الصورة و عدلتوها و كل شي تمام. شراح تسوون بعدين؟ الاغلب راح يطرشها حق الأهل بالواتساب او يحطها بالفيس بوك او الانستغرام او هالأماكن. بس لا تخلونها توقف اهني و تصير اسيرة الكمبيوتر و الشاشة. صدقوني الصورة على الورق واايد غير. حلو انكم تبروزونها ببيتكم او تطبعونها و تشوفنها على باب الثلاجة كل يوم . او تحطونها بالبوم عيالكم كل ما بغو خذوه و طالعو فيه. اذا بتطبعونها بالبيت انصح بـ Canon Selphy او تقدرون تطرشونهم حق شركات اهمه يطبعونهم و يدزولكم اياهم. انا كان عندي تجربة حلوه مع mixbook.com كتبتلكم عنها من قبل و بعد في ويب سايت بالكويت اسمه snapprint.com ما جربته و لا مره بس الويب سايت شكله حلو و اسعارهم معقوله و عندهم وايد احجام. اذا في احد مجربه من قبل خل يقولنا عن تجربته.