وايد أحب فكرة إني أسوي البرد بروحي بالبيت. ما ادري أحس هم وناسة و شي حلو نسويه مع اليهال و هم أقدر أتحكم بكمية الشكر و الدهن الي بالبرد و أقدر أحط النكهات الي أبيها. عندي صانعة آيس كريم بالبيت بس متعبة شوي لأنه القالب لازم ينحط بالفريزر أول . المهم فآنا دايما أدور الأشياء السهلة الي نفس جذي قوالب و تعبينهم و خلاص. كنت مجربة من إيكيا بعد القوالب الي بو عواد بس ما عجبوني لأنه فيهم وايد أجزاء و بسرعة يضيعون مع المواعين. شفت هالقوالب قبل فترة و قلت خل أجربهم.
أول شي شريت جيس واحد بس لأنه الكمية الي يشيله كل قالب كلش شوي رحت شريت بعد جيسين. جربت أحط فيهم حليب ككاو و عصير مانجا و سموذي مانجا ( مانجا مثلجة - روب - حليب و شكر). تعبئة القالب بالحليب و العصير كانت وايد سهلة بس السموذي لأنه قوامه ثخين شوي فأذاني على ما حطيته داخل. بس المشكلة عيالي بس حبو السموذي و ما عجبهم حليب الككاو المثلج و لا العصير أبدا.
القالب نفسه جودته وايد زينه ( مصنوع من مادة تشبه المطاط) و الي عجبني فيه بعد أنه مافي وايد أجزاء فما يضيعون بسرعة و هم مو لازم يتثبت عمودي بالفريزر فوايد زين حق الي ما عندهم وايد مكان بالفريزر نفسي.
الإيجابيات:
- سهل تنظيفه
- ما في وايد أجزاء ما يضيع بسرعة مع المواعين
- مو لازم يكون مستقيم فما ياخذ وايد مكان بالفريزر
- جودة القالب نفسه زينه و يتحمل
- جودة القالب نفسه زينه و يتحمل
السلبيات:
- ما يشيل وايد
- سعره شوي غالي يعتبر ( القالب الواحد يطلع حوالي ال٤٠٠ فلس)
- صعب تعبئته ( اذا سموذي)
- صعب تعبئته ( اذا سموذي)
أنصح فيه؟ لأ لانه هم سعره غالي و ما يشيل وايد و احتمال كبير إنكم ما راح تستخدمونه وايد.
الي عندها قوالب اهيه مجربتهم أو وصفات آيس كريم منزلي صحي يريت تفيدنا.
No comments:
Post a Comment