٣ وصفات : ٣ صوصات للسلطة

السلام عليكم...عيدكم مبارك و تقبل الله أعمالكم. اليوم يايبتلكم ثلاث وصفات حق صوص السلطة ( الشي الي دايما أكره أسويه آخر شي لمن اكون قاعد اطبخ الغدا). ثلاثتهم وايد سهلين و لذيذين. تقدرون تسوونهم ثلاثتهم و تخلونهم بالثلاجة و تطلعونهم أي وكت بتسوون سلطة. كلهم فيهم عسل او شكر اسمر لأني أحب الطعم الحالي شوي بالسلطة. بس تقدرون تسوونهم بدون الشكر أو العسل.

١- خلطة البولساميك

هذي أكثر وحدة احنا نحبها و أكيد ذايقينها وايد بالمطاعم. جربوها وايد لذيذة و ما يبيلها وايد مقادير.


١/٤ كوب خل بلساميك
٢ فص ثوم مهروس
٢ م شاي شكر أسمر ( اختياري)
١/٢ م شاي ملح
١/٢ م شاي فلفل أسود توه مطحون
٣/٤ كوب زيت زيتون


- خلطو كل المكونات مع بعض ما عدا الزيت زيتون. و انتو قاعد تحركون القفشة شوي شوي ضيفو الزيت زيتون و خلطو المكونات.



٢- خلطة الخردل مع العسل

١/٤ كوب عصير ليمون طازج
٣ فصوص ثوم مهروسة
٢ م كبيرة خردل ديجون
٣ م متوسطة عسل
١/٢ م شاي ملح
١/٢ م شاي فلفل أسود
٣/٤ كوب زيت زيتون

- نفس الشي ، خلطو المكونات كلها ويا بعض ما عدا الزيت زيتون خلوه آخر شي و ضيفوه شوي شوي عالخلطة


٣- خلطة خل التفاح مع العسل

فص ثوم مهروس
١ م كبيرة خردل ديجون
١/٤ كوب خل تفاح
٢ م كبيرة عصير ليمون طازج
٢ م كبيرة عسل
١/٢ م شاي ملح
١/٢ م شاي فلفل أسود
١/٢ كوب زيت زيتون



* الزجاجات الي بالصورة ماخذتهم من ليك لاند مارينا مول، و لزقات الطباشير من ايكيا.