شوربة المنستروني ( نفس أوليف غاردن olive garden )

إلي رايح أوليف غاردن و مجرب شوربتهم المنستروني يعرف شكثر اهيه لذيذة معنى شكلها و الأشياء الي فيها ما يوحون. هذي طريقتي لمن أشتهي الشوربة و أبي أسويها بالبيت. برأيي المتواضع تطلع أحلى من المطعم بعد 

شوربة المنستروني الإيطالية:

المقادير:

٣ م ك زيت زيتون

بصلة صغيرة مفرومة

١ كوسا متوسطة مقطعة حلقات

١/٢ كوب فاصوليا خضرا مثلجة

١ م ك معجون طماط

٤ فصوص ثوم مهروس

٤ أكواب ماي مذاب فيهم ققشتين كبار مرقة خضار ( انا استخدم ماركة أرض الطبيعة)

علبة فاصوليا حمرا مطبوخة

حوالي كوب سبانخ مثلجة

علبة طماطم مقطعة ( تلاقونها يم معجون الطماط بالجمعية) او طماطة وحدة كبيرة مقطعة مكعبات كبار

١/٢ كوب جزر مبشور

قفشتين كبار بقدونس مفروم

١ ١/٢ م ش اوريجانو

١/٢ م ش فلفل اسود

١ ١/٢ م ش ملح

١/٤ م ش زعتر ناشف

١/٢ كوب معكرونية قواقع

الطريقة:

• حمسو الزيت زيتون مع البصل لمن يذبل و يصير شفاف. ضيفو السبانخ و حمسو لمن تذوب و تذبل.    ضيفو الفاصوليا الخضرا، الكوسا ، الجزر معجون الطماط ،  الطماط المقطع ، الثوم و البقدونس. 

• ضيفو الماي مع مرق الخضار، الفاصوليا الحمرا، البهارات ( الملح و الفلفل الاوريجانو و الزعتر)

• خلو الماي يغلي بعدين صكرو راس الجدر، وطو عالنار  و خلو الخضار تطبخ لمدة ١٥-٢٠ دقيقة.  ضيفو المعكرونية ، اذا حسيتو انه الشوربة وايد خاثرة و مافي ماي كفاية عشان المعكرونية تطبخ زيدولها ماي ( كوب - كوبين) . خلو الشوربة تغلي مرة ثانيه و بعدين قصرو عالحرارة و صكرو الراس عشان تنطبخ المعكرونية. هم ياخذ ١٠-١٥ دقيقة. و بسس.

----------------------------------------------------------------------------------------------------------------------------

* ملاحظة: البوست منقول من أكاونتي بالانستغرام kitchenista86 بس لاني أبي اصكر الأكاونت  راح انقل كل المواضيع و الوصفات الي فيه اهني بالمدونة