Molten Cake Recipe كيكة المولتن

كيكة المولتن من ألذ الكيكات الي انشهرت بالفترة الأخيرة. بس للأسف الأغلب بالكويت ما يسوونها بطريقتها الأصلية. فكرة المولتن أنه الخلطة تكون أغلبها ككاو و بيض و شووية طحين عشان بس الأطراف تمسك لمن تدخلونها الفرن و بس تمسك الأطراف تطلعونها بحيث أنه الي داخل يظل سائل. أغلب الي شايفتهم يسوونها انه يسوون كيكة ككاو عادية و بعدين يحطون داخلها ككاو و يخلونه يذوب...هم حلو بس الطريقة الأصلية وايد أسهل و أحلى و تحتاج مقادير أقل.

طريقة المولتن (الأصلية)

المقادير حق أربع كيكات صغار

المقادير:

- ١٧٠ جرام ككاو ( العادي أو الدارك على حسب انتو شتفضلون ، او تقدرون تخلطون من النوعين)

- قالب زبدة 

- بيضتين

- صفار بيضتين

- رشة ملح

- ربع كوب شكر

- ٢ ملعقة كبيرة طحين

الطريقة:

- سخنو الفرن على حرارة ٢٠٠ س (٤٠٠ ف)

- بحمام مائي ذوبو الككاو و بس يذوب ضيفوله الزبدة و خلطو عدل بعدين شيلو خليط الزبدة و الككاو من النار

- بطاسة بروح خلطو بيضتين مع صفار بيضتين و الشكر و الملح و الطحين. خلطو عدل و لمن يمتزجون كلهم عدل ضيفولهم خليط الككاو.

- دهنو أربع طوس فرن بزبدة و رشوهم بشوية طحين. و زعو الخلطة عالطوس بالتساوي و رصوهم بصينية فرن. 

- دخلو الصينية الفرن عالشبك الي بالنص. خلوه يطبخ بالفرن ١٢-١٤ دقيقة او لمن الأطراف تبدا تتحمر و تصك. كل ما تخلونه أكثر الكيكة من داخل تصك أكثر.

- طلعو الكيكات من الفرن و خلوها تبرد شوي. راح تشوفون الأطراف تكش شوي و توخر عن حواف الطاسة. مررو سجينة عالحواف بس عشان تتأكدون أنه الكيكة مو لازقة. قلبو كل كيكة بصحن و قدموها مع برد.

----------------------------------------------------------------------------------------------------------------------------

* ملاحظة: البوست منقول من أكاونتي بالانستغرام kitchenista86 بس لاني أبي اصكر الأكاونت  راح انقل كل المواضيع و الوصفات الي فيه اهني بالمدونة

طريقة عمل الفانيليا المنزلية

أحب أسوي الفانيليا السائلة الي  استخدمها حق الكيك و هالسوالف بروحي بالبيت. طريقته وايد سهلة و يطلع وايد أحلى من الي تشترونه بالجمعيات و هم يمكن يطلع أرخص بعد. كل الي تحتاجونه اعواد فانيليا كاملة (٨ أعواد) تحصلونه بمركز سلطان او دين آند ديلوكا و جلسرين صافي pure gylcerine تحصلونه بالصيدليات (كوبين). 

الطريقة:

- صبو الجلسرين بزجاجة تتصكر من فوق ( اذا تحصلون زجاجة سودة أو غامجة يكون أحسن لانه لازم الضوء ما يحوشه وايد، بس انا ما حصلت فحطيته بهالزجاجة من ايكيا.

- قصو الفانيليا بالسجينة بالطول و طلعو البودر الأسود الي داخل و صبوه بالزجاجة. بعدين حطو أعواد الفانيليا كلها داخل.

- صكرو راس الزجاجة و حطوها بمكان بارد و ناشف و ما يحوشه ضوء لمدة ٦ اسابيع، بعدها تقدرون تستخدمونه عادي نفس الفانيليا السائلة. 

هذي الكمية راح تظل عندكم فترة طويلة و تقدرون تستخدمونها مع القهوة و هالسوالف بعد.  لمن تخلص الكمية الي عندكم لا تقطون أعواد الفانيليا خلوها و ضيفو عليها الكمية اليديدة جذي الطعم يطلع أحلى و أقوى. 

The easiest recipe for lemon curd مربى الليمون

(مربى الليمون ) أو صوص الليمون  اقرب ترجمة باعتقادي حق ال lemon curd الي الأجانب يستخدمونه بحلوياتهم . اهي خلطة يسوونها من الليمون و قشر الليمون ، زبدة و شكر و بيض و عادة يطبخونها على نار هادية و بحمام مائي. حالية و حامضة و وايد لذييذة. تقدرون تحطونها فوق البسكوت او التوست او بالكيك او بالجيز كيك. سويتها جم مرة من قبل بس دايما تطلع وياي شوي زفرة او تتكتل وياي. بس هالمرة لقيت هالوصفة السهلة من myrecipes.com  و احلى شي انها تنطبخ بالمايكرويف فما يبيله لا  حمام مائي  ولا عفسة. 

مربى الليمون

٦ ليمونات

قالب زبدة (ناعم)

كوبين شكر

٤ بيضات

الطريقة:

- بشرو القشر من الليمونات ( ديرو بالكم لا تبشرون الطبقة البيضا لأنها مره بس الطبقة الصفرة) لمن يصير عندكم مقدار قفشتين كبار من قشر الليمون.

- عصرو الليمونات بعدين لمن يصير عندكم كوب عصير.

- ضربو الزبدة و الشكر بالخلاط الكهربائي. ضيفو البيضات وحدة وحدة و خلطو بعد كل اضافة. شوي شوي ضيفو عصير الليمون و تمو تخلطون بالخلاط بس على سرعة واطية. ضيفو بعدين قشر الليمون و خلطوه بالقفشة.

- حطو الخليط كله بطاسة تدش المايكرويف ( microwave safe(  و دخلوها المايكرويف.

- خلو المايكرويف على اعلى طاقة و شغلوه ٥ دقايق بس وقفو بعد كل دقيقة و حركو الخليط بعدين ردوه و شغلو المايكرويف .

- بعد ال ٥ دقايق شغلو المايكرويف نص دقيقة (٣٠ ثانية) و خلطو . سوو جذي لمن الخليط يخثر و لمن تشيلون القفشة تشوفون طبقة سميكة عليها . راح تحتاجون دقيقة إلى دقيقتين لمن الخليط يوصل لهالمرحلة.

- الحين غطو الخليط بنايلون و خل النايلون يلامس المربى عدل ( يعني لا تغطون الطاسة بس و تخلون فراغ فوق المربي- نزلو النايلون لتحت) و دخلوه الثلاجة خل يبرد على الاقل ٤ ساعات قبل لا تستخدمونه.

ملاحظات:

- هذي الطريقة راح تسويلكم وايد مربى ( تقريبا كوبين او اكثر) . تقدرون تسوون نص الكمية او ربعها اذا هذي اول مره بتجربونه بس اكيد وكت الطباخ راح يختلف فديرو بالكم.

- ما ادري شكثر تقعد المربى بالثلاجة قبل لا تخترب. انا مسويتها قبل اسبوع تقرييا و للحينها ما اختربت بس اعتقد تظل وايد لانه فيها وايد شكر.