Thursday, September 10, 2015

وصفة سلطة العيش الأسود مع المانجا و الأفوكادو Black rice and mango salad

العيش الأسود نوع من أنواع العيش المتين ( المصري) قصير الحبة . يسمونه بعد العيش البنفسجي ( لانه لمن يطبخ يتحول لونه بنفسجي) و هم يسمونه العيش المحرم لأنه بالصين قبل بس الإمبراطور و العائلة الحاكمة كانو يقدرون ياكلونه و يزرعونه و الي يزرعه أو ياكله غيرهم يعاقبونه. طعمه لذيذ يشبه العيش الأسمر بس شوي على حلات أكثر و متروس فوايد و فيتامينات و في مضادات أكسدة أكثر من البلوبريز. طبعا ماراح تحصلونه بالجمعيات العادية بس أكيد تحصلونه بمركز سلطان و لولو هايبر و هذيل. أنا لقيته بسيفكو بالصدفة و جربت آكله بأكثر من طريقة بس أحلى شي طلع بهالوصفة.














































سلطة العيش الأسود مع المانجا و الأفوكادو



المقادير:

٣/٤
كوب عيش اسود
١/٤ م ش ملح
نص مانجا كبيرة مقطعة مكعبات
١/٢ افوكادو مقطعة مكعبات
١/٤ كوب لوز محموص
١/٤ كوب كزبرة فريش مقصصة
١/٤ كوب بصل احمر مقطع مكعبات

الصلصة:
١/٤ كوب عصير ليمون اخضر
١ و نص م ك زيت زيتون
١ م ش عسل
١/٤ م ش ملح
فص ثوم مهروس
٢ م ك كزبرة فريش مفرومة
ملح و فلفل



الطريقة:

 - غسلو العيش عدل و حطوه بجدر مع كوب و نص ماي و شوية ملح. غطو راس الجدر . لمن يغلي الماي قصرو عليه و خلوه يطبخ ٣٠-٤٠ دقيقة. لمن يطبخ شيلوه من النار و فردوه بصينية فرن و دخلوه الثلاجة لمن يبرد. بس يبرد حطو عليه نص الصلصة و خلطوه مع باجي مقادير السلطة- قدمو باجي الصلصة عالجنب.


----------------------------------------------------------------------------------------------------------------------------

* ملاحظة: البوست منقول من أكاونتي بالانستغرام kitchenista86 بس لاني أبي اصكر الأكاونت  راح انقل كل المواضيع و الوصفات الي فيه اهني بالمدونة







No comments:

Post a Comment