السلام عليكم...من زمان ما نزلت شي بالمدونة. كنا اول شي لاهين بالإمتحانات و نهاية المدرسة بعدين سافرنا بالعطلة و بعدها لازم نقاهة بعد السفر مع اليهال ( الموجي الي يبجي) . المهم اليوم يايبلتلكم وصفة صلصة الرانش تسوونها بالبيت ، سهلة و لذيذة و راح تخليكم تاكلون سلطة أكثر.
إلي ما يعرف الرانش ranch اهيه صلصة أمريكية الأصل و المنشأ. واحد أمريكي اسمه ستيف هينسون ألفها بالخمسينات و بعدين بدا يقدمها بمطعمه و من كثر ما الناس كان عاجبهم قامو يشترون منه الصلصة بروحها و شوي شوي سوولهم مصنع و قامو يبيعونها بكل جمعيات أمريكا. لمن كنا عايشين بأمريكا كنا نشتري منها وايد بس اهني بالكويت ما في شي وايد عجبني فقررت أسويها بروحي و زين الحمد لله طلعت سهلة و ما يبيلها وايد مقادير.
أنا أحب أقدمها أكثر شي مع خضار طازجة مقصصة و نغمسهم فيها. بس هم تقدرون تحطونها فوق السلطة العادية مالت كل يوم أو حتى مع الجيكن فيليه و الجيكن نقتس لذيذه.
صلصة الرانش
الوصفة الأصلية اهني
المقادير:
- كوب مايونيز
- نصف كوب كريمة حامضة ( أو تقدرون تستخدمون بداله لبنه عادي)
- فص ثوم مهروس
- ربع ملعقة شاي ملح
- ١/٤ كوب بقدونس مفروم
- قفشتين شبنت مفروم
- ١ ملعقة شاي صلصة الوستشر worcestershire sauce ( تلاقونه بالجمعيات يم صلصة الصويا)
- ١/٢ ملعقة شاي فلفل أسود
- ١/٢ ملعقة شاي خل أبيض
- ١/٤ ملعقة شاي بابريكا
- رشة دقوس
- ١/٤ إلى ١/٢ كوب لبن ( على حسب شكثر تحبون الصلصة تكون خاثرة)
الطريقة:
- حطو كل المقادير بطاسة و خلطوهم بالقفشة عدل.
- ضيفو عليه اللبن بالتدريج. ابدو اول شي بربع كوب و خلطو و بعدين زيدو لمن تعجبكم خثارة الصلصة. أنا استخدمت ١/٣ كوب.
- الوصفة الأصلية تقول لازم تدخلونه الثلاجة جم ساعة بعدين تقدمونه. بس انا الصراحة قدمتها نفس الوقت و كانت لذييذة.
* تقدرون ما تحطون بابريكا اذا ما عندكم. انا ما كان عندي فما حطيت بس أتوقع يطلع أحلى مع البابريكا.
* اذا ما يعجبكم طعم الثوم وايد تقدرون تقللون الكمية و تحطون نصف فص بدال فص كامل.
No comments:
Post a Comment