(مربى الليمون ) أو صوص الليمون اقرب ترجمة باعتقادي حق ال lemon curd الي الأجانب يستخدمونه بحلوياتهم . اهي خلطة يسوونها من الليمون و قشر الليمون ، زبدة و شكر و بيض و عادة يطبخونها على نار هادية و بحمام مائي. حالية و حامضة و وايد لذييذة. تقدرون تحطونها فوق البسكوت او التوست او بالكيك او بالجيز كيك. سويتها جم مرة من قبل بس دايما تطلع وياي شوي زفرة او تتكتل وياي. بس هالمرة لقيت هالوصفة السهلة من myrecipes.com و احلى شي انها تنطبخ بالمايكرويف فما يبيله لا حمام مائي ولا عفسة.
مربى الليمون
٦ ليمونات
قالب زبدة (ناعم)
كوبين شكر
٤ بيضات
الطريقة:
- بشرو القشر من الليمونات ( ديرو بالكم لا تبشرون الطبقة البيضا لأنها مره بس الطبقة الصفرة) لمن يصير عندكم مقدار قفشتين كبار من قشر الليمون.
- عصرو الليمونات بعدين لمن يصير عندكم كوب عصير.
- ضربو الزبدة و الشكر بالخلاط الكهربائي. ضيفو البيضات وحدة وحدة و خلطو بعد كل اضافة. شوي شوي ضيفو عصير الليمون و تمو تخلطون بالخلاط بس على سرعة واطية. ضيفو بعدين قشر الليمون و خلطوه بالقفشة.
- حطو الخليط كله بطاسة تدش المايكرويف ( microwave safe( و دخلوها المايكرويف.
- خلو المايكرويف على اعلى طاقة و شغلوه ٥ دقايق بس وقفو بعد كل دقيقة و حركو الخليط بعدين ردوه و شغلو المايكرويف .
- بعد ال ٥ دقايق شغلو المايكرويف نص دقيقة (٣٠ ثانية) و خلطو . سوو جذي لمن الخليط يخثر و لمن تشيلون القفشة تشوفون طبقة سميكة عليها . راح تحتاجون دقيقة إلى دقيقتين لمن الخليط يوصل لهالمرحلة.
- الحين غطو الخليط بنايلون و خل النايلون يلامس المربى عدل ( يعني لا تغطون الطاسة بس و تخلون فراغ فوق المربي- نزلو النايلون لتحت) و دخلوه الثلاجة خل يبرد على الاقل ٤ ساعات قبل لا تستخدمونه.
ملاحظات:
- هذي الطريقة راح تسويلكم وايد مربى ( تقريبا كوبين او اكثر) . تقدرون تسوون نص الكمية او ربعها اذا هذي اول مره بتجربونه بس اكيد وكت الطباخ راح يختلف فديرو بالكم.
- ما ادري شكثر تقعد المربى بالثلاجة قبل لا تخترب. انا مسويتها قبل اسبوع تقرييا و للحينها ما اختربت بس اعتقد تظل وايد لانه فيها وايد شكر.
No comments:
Post a Comment